Во преполниот амфитеатар на Младинскиот парк, меѓу своите сограѓани, синоќа групата Соната го одбележа својот 10-ти роденден.

Скромните момчиња и девојката Кате Брезева, како што љубат да ги нарекуваат велешани, на Велес му подарија извонреден концерт.

На отворената сцена, во паркот, несекојдневното музичко доживување траеше час и половина  а гости на групата Соната беа Виолета Томовска, Гоце Арнаудов, Ирена Спасевска и Ферус Мустафов.

Концертот го отворија славениците со прекрасните интерпретации на познатите велешки староградски песни , снимени на ЦД и ДВД минатата година. Групата Соната и Кате Брезева ги отпеаја „Ај што убаво одат велешките моми", „Во влашкото маало", „Елено ќерко".

Ја воодушевија публиката која заедно со нив пееше и постојано аплаудираше.

Секако за убавата атмосфера на концертот со својот настап и извонредни интерпретации придонесоа и гостите. Примадоната на македонската фолк сцена Виолета Томовска рече:

„ Тие се извонредно квалитетна  група, нивното време доаѓа. Она што е посебно кај нив тоа е лирската боја на гласот  на Кате што плени и воодушевува подеднакво во сите изведби, во песните со љубовен карактер, во изворните или староградски песни, во новокомпонираните и забавните, мислам на шансоните", рече Томовска 

Кулминацијата синоќа се случи кога на сцената со саксафонот и кларинетот Ферус ги отсвири добро познатите чочеци и македонски ора а Гоце Арнаудов се симна во публика и ги отпеја своите најпознати хитови.

Пред велешани Гоце и Катерина Брезева го изведоа својот дует, песната „Те слушам како дишеш" и најавија дека летово ќе ги почестат со видео спот. Групата Соната  ја изведе  и песната „Чувај ми го мајко герѓевот" со која освои втора награда на Гоце фест, а Кате награда за интерпретација.

Јубилејниот концерт, кој освен велешани го проследија и колеги, текстописци и композитори на славениците, заврши со песната „За многу години македонци" во интерпретација на Томовска, Арнаудов, Спасовска и Брезева.