Почина сопругот на покојната актерка Британи Марфи. Најверојатно смртта настанала поради срцев удар, пренесува Дејли Мејл.

И покрај напорите на докторите да го вратат во живот, сценаристот Сајмон Монџек почина во својот дом во „Холивуд хилс" каде некогаш живееше со својата сопруга, актерката Британи Марфи. Неговата смрт настапи по само пет месеци откако актерската ѕвезда Британи (32) исто така почина во нивниот заеднички дом, откако падна во бањата.

Монџек (39) и претходно говорел за своите проблеми со срцето, кога во интервјуто по смртта на својата жена рече дека „имал напади".

„Имав срцев напад додека се враќав од Пуерторико минатата година", изјави тогаш Монџек, пренесува Ројтерс.

Неговата смрт ја истражува полицијата во Лос Анџелес. Наредникот Луи Лозано изјави дека полицијата одговорила на 911 повик поради „недефинирана медицинска помош".

Британи Марфи почина поради престанок на работата на срцето на 20.декември во рацете на својот сопруг Монџек додека нејзината мајка викала помош. Тој подоцна опишувал како се обидувал да ја реанимира и како само за крај ја бакнал откако починала.

По нејзината смрт, Монџек предизвика контроверзии бидејќи бараше од властите да не вршат обдукција на телото на неговата сопруга. Тогаш изјави дека не може да ја поднесе идејата да го отвараат телото на неговата сопруга. Ова доведе до многу трачеви на интернет дека тој бил вмешан во нејзината смрт, што тој остро го демантираше.

Резултатите од истрагата во февруари покажаа дека Британи починала од воспаление на белите дробови кое се искомплицирало од недостаток на железо, анемија и труење од лекови. Официјалната истрага подоцна соопшти дека нејзиното срце престанало да работи поради големи количини на лекови.

Copyright 2010 makfax Сите права се задржани. Текстов не смее да се печати или емитува, во целина или во делови без договор со makfax.