Министерството за транспорт и врски распиша јавни објави за отуѓување на државно градежно неизградено земјиште по пат на електронско јавно наддавање наменето за изградба на бензински пумпни.

Станува збор за три локации кои се наоѓаат во општините Прилеп, Свети Николе и Градско, а целта на јавните објави е овозможување нови инвестиции, односно изградба на нови бензински пумпни станици и услужни центри долж магистралните и регионалните патни правци, информираат од Министерството за транспорт и врски.

Локацијата во општина Прилеп се наоѓа на магистралниот пат М5 кој го опфаќа и патниот правец Велес - Прилеп - Битола. Станува збор за градежна парцела со вкупна површина од 27.070 метри квадратни со почетна цена на јавното наддавање од 300 денари по метар квадратен.

Локацијата во општина Свети Николе се наоѓа на регионалниот пат, односно патниот правец Куманово - Свети Николе- Кадрифаково. Се работи за градежна парцела со вкупна површина од 41.094 метри квадратни со почетна цена на јавното наддавање од 150 денари по метар квадратен.

Локацијата во општина Градско се наоѓа на магистралниот пат М1, односно на Коридорот 10. Ќе се лицитира за градежна парцела со вкупна површина од 27,982 метри квадратни со почетна цена на јавното наддавање од 130 денари по метар квадратен.

Пријавите за учество на јавните наддавања за секоја локација одделно може да се достават најдоцна до 12 март.2012 година. 

Copyright 2011 makfax Сите права се задржани. Текстов не смее да се печати или емитува, во целина или во делови без договор со makfax.