Велешанката Марија Манасиевска се израдува кога денеска дома и дојде нејзиното несекојдневно друштво, медицинската сестра и волонтерот од Црвен Крст. И го измерија притисокот, поразговараа со неа и видно ја расположија. Нивното дружење трае веќе три месеци, а ќе трае во наредните две години. Марија секогаш со душа ја очекува нивната посета, вели тие и прават друштво во пензионерските денови.

„Многу сум задоволно од нивната посета. Се ми помагаат. Ми го мерат притисокот, ми носат лекови, ми помагаат и во домот за било каква работа. Многу се радувам уште од врата кога ќе ги видам", рече Манасиевска.

Марија е само една од шеесете стари лица во градот на кои им помагаат овие луѓе. Двете медицински сестри и дваесетте волонтери кои се вклучени во проектот,еднаш неделно ги посетуваат во нивните домови.

„Покрај тоа што им помагаме во домот, и им купуваме лекови тие највеќе сакаат да разговараме со нив. Замислете сами седат во четири ѕида и кога ќе не видат едвај чекаат да разговараат и не гледаат како внуци", рече Анѓел Јорданов, волонтер.

Проектот го спроведува општинската организација на Црвен Крст во соработка со центарот за социјални работи и матичните лекари.

„Целта на проектот е да им се помогне на овие лица во домашни услови. Живееме во едно модерно време каде што практично се нема време да се посвети време на оние луѓе чиј што живот е веќе при крај, кои имаат одредени здравствени проблеми но и оние кои имаат социјални потреби, дружење, разговор и сл", рече др. Милчо Трајков, претседател на О.О. на Црвен Крст.

Проектот чини четириесет илјади евра, пари од австрискиот Црвен Крст. Освен во Велес тој се реализира во Крива Паланка и Скопје.