Одобрувањето на писмото со намери на Метрудхем од страна на Министерството за животна средина е провокација  на велешката јавност, сметаат од Зелената коалиција. 

„За да нема шпекулации го повикуваме Министерството за животна средина на поголема транспарентност, и да го објави писмото кое што го има одобрено наводно на Метрудхем и неговата содржина со цел да видиме дали ова што го имаме како информација е вистина и дали навистина во писмото со намери Метрудхем ја бара истата локација со старата опрема и старата технологија, рече Ненад Коциќ, Зелена коалиција. 

Од Метрудхем велат дека досега немаат добиено официјален одговор од Министерството за животна средина. Последниот контакт го имале пред месец и половина кога го поднеле писмото со намери. Сега ја очекуваат студијата со сите барања што треба да ги исполнат за да можат да ја добијат дозволата.

Зелените сега будно ќе ги следат активностите и на Министерството и на Метрудхем. Порачуваат институциите да си го исполнат ветувањето дека нема да дозволат Велес повторно да биде црна точка и непогодно место за живеење.