Верувањето  дека тој што прв ќе го допре осветеното дрво изрезбано во форма на христовото распетие, ќе го следи среќа, здравје и благосостојба во текот на целата година, беше причина  во село Богомила младите момчиња најнапред  да го  искршат  мразот во реката Бабуна  за да може во реката свештеници на МПЦ да го извршат чинот на осветување  на водата и фрлањето на светиот крст.

Се верува дека на денешен ден пред 20 векови, Свети Јован во водите на реката Јордан го крштевал синот Божји Исус Христос, кој оттогаш се нарекува Јован Крстител. Фаќањето на крстот претставува соединување на човекот со Христа, а сите верници кои ќе го бакнат или допрат осветениот крст ќе го примат божјиот Благослов. Богојавление Водици е еден од најголемите христијански празници кој традиционално се почитува во цела Македонија. Со него завршуваат 12-те т.н. некрстени денови и циклусот зимски празници како Бадник, Божик, Василица. Се верува дека на Богојавленската ноќ небото се отвара, се појавува Бог, а луѓето му се обраќаат за да им ги исполни желбите. Во тој миг водите престануваат да течат и стануваaт лековити.