Жителите од општина Чашка и надлежните од локалната самоуправа наскоро треба да решат како да ги потрошат 60-те илјади евра кои ги обезбеди меѓународната фондација ЦИРА.

Во конкуренција се уште четири проекти за кои веќе е изработена и финалната верзија. Експертски тимови на ЦИРА ги подготвија проектите со вклучен комплетен буџет.

Реконструкција на улици и патишта во Горно и Долно Јаболчиште,изградба на спортски терени во населба Чашка,водовод во село Бусилци и реконструкција на Планинарскиот дом Чеплес. Ова се проектите кои влегуваат во трката за добивање на финансии.

Парите ќе се доделуваат транспарентно на форумски седници на кои учествуваат работни групи што ги подготвувале овие и останатите проекти. На јавно гласање токму од учесниците на форумите ќе се одлучи кој проект ќе се реализира со парите од ЦИРА.

Досега се одржаа пет форуми,а на шестиот кој е и последен ќе падне одлуката. Поединечно секој од проектите тежи приближно од 747 000 до 3,5 милијони денари.

Според некои најави постои можност евентуално да се одберат за реализација и два проекти.

„Интересот кај жителите од Чашка за учество на форумите е многу голем. Моделот со форуми и јавно гласање се покажа како исклучително добар потег„вели Александар Кукулев координатор на проектот, Форуми во заедницата.