Британскиот пејач Џорџ Мајкл почна да се лекува од зависност од алкохол, еден ден по несреќата предизвикана од пијанство, објавува сајтот Диџитал кој пишува за шоу бизнисот, пренесува Бета.

Мајкл е уапсен минатиот месец, кога изгуби контрола над автомобилот и удри во продавница, во елитниот дел на Лондон каде што живее. Пред една недела тој ја призна вината пред судот во Лондон, дека поседувал канабис и дека возел под дејство на алкохол и дрога. Судот на Мајкл му изрече привремена мерка, забрана за управување со моторно возило во траење од шест месеци, а пресудата ќе биде изречена на 14 септември.

„Сакам на сите искрено да ви се заблагодарам и да ги смирам сите оние кои се загрижени за мене. Целосно сум свесен за сериозноста на ситуацијата, поради што искрено се извинувам" - напишал пејачот на својот блог. „Мислам дека треба да знаете дека ден по инцидентот се пријавив во лондонската клиника на 14 дневна програма за детоксикација, по што следеше советување неколкупати неделно" - додаде тој. „Сакам да им се заблагодарам и на оние чија дискреција овозможи тој процес да започне далеку од очите на јавноста, што во голема мера ми помогна" - заклучува Мајкл.

Copyright 2010 makfax Сите права се задржани. Текстов не смее да се печати или емитува, во целина или во делови без договор со makfax.