Почна реконструкцијата на велешката болница. Веќе пет дена се одвиваат градежните работи.

Се реконструира хируршкото одделение каде е сместена трауматологија, ортопедија и урологија.

По девет месеци кога ќе завршат градежните работи и на интерното одделение, покривот и комплетниот санитарен чвор, велешани ќе добијат модерна болница со современ рентген апарат, томограф и други апарати неопходни за подобрување на болничките услуги.

„Велешката болница ќе добие шеснаесетслајсен томограф Идејата е да направиме модерни болници . Се разбира дека модернизацијата не значи само реконструкција и опрема туку значи и порадикални мерки со цел да се создаде пофункционален систем, но мора да се бориме на сите фронтови. Со завршување на реконструкцијата и доаѓање на опремата имаме и барање за вработување на нови доктори, рече Бујар Османи",министер за здравство.

„Во најскоро време очекуваме да пристигне апаратот за томогрфија. Наша обврска е за кратко време да го адаптираме просторот и на тој начин ќе добиеме многу на дијагностиката и терапијата на пациентите, рече др.Ванчо Граматов, директор на Општа болница Велес.

Реконструкцијата на болницата е дел од Владиниот проект за модернизација на здравствениот систем. За градежните работи ќе се потрошат 600 илјади евра додека за опрема Владата ќе издвои еден милион евра. И додека трае реконструкцијата од велешката болница велат дека пациентите и понатаму ќе ги добиваат сите здравствени услуги. 

Ова е првата фаза од реконструкцијата која изведувачот мора да ја заврши за девет месеци. Во спротивно ќе добие казнени пенали. Во втората фаза ќе се реновира  физикалното одделение и трансфузиологија.