Драматично опаѓа нивото на водата во велешкото Езеро Младост.

Во последнава недела таа е повлечена од брегот за околу еден метар.

До редакцијата на веб-порталот „Лисица“ денеска пристигна реакција од спортските риболовци кои секојдневно се на Езерото. Според нив можно е да се случи вистинска катастрофа доколку продолжи нивото на Младост да опаѓа.

За оваа состојба сведоци се и многуте кампери. Тие велат дека под итно мора да се стави крај на појавата која е идентична со онаа од претходното лето.

Засега точно не се познати причините поради кој се случува ова ,но сомневањата на риболовците  одат во насока дека водата од Езерото се користи за наводнување на околните лозја кои се пред бербата и сега водата им е најмногу потребна.

Вистинско прашање е дали некој смее да се користи водата од Езерото за наводнување? Според одговорните во Министерството за водостопанство, нема фирма концесионер на водата од Младост, што значи дека никој нема право да ја користи за наводнување.

Ваков драматичен пад на нивото на велешкото езеро имаше и пред една година. Тогаш надлежните тврдеа дека во овој период нивото на Младост секогаш е на најниско ниво ,оти врнежите се сведени на минимум. Тогаш имаше сомневања дека водат се губи преку колекторскиот систем, но истите се покажаа како неточни.