Неколку седмици работниците од Керамичката индустрија „Киро Ќучук" од Велес наместо покрај машините седат дома. Причина е дефект на големата печка за тенкоѕидни елементи во која се произведуваа 35 милиони единици тенкоѕидни елементи.

Експертите велат дека нередовниот ремонт на печката е главниот проблем кој  доведе најнапред до дефект на инсталација  за мазут за потоа и технички и технолошки таа целосно да  престане да функционира. 

Од компанијата  велат дека  за купување на шините, потоа  за репарација на вагоните , за замена на инсталацијата за мазути, паднатиот плафон на печката, изолационите средства  и друго  се потребни големи пари.

И додека  250-те работници , кои повеќе месеци немаат земено десетина па и повеќе плати, седат дома.

„Состојбата во Керамичката индустрија „Киро Ќучук" во Велес е повеќе од тешка. Синдикатот за градежништво нема да биде нем посматрач на случувањата во фабриката. Загрижени сме за настанатата состојба како на фабриката така и за вработените. Ако во скоро време не дојде до рестартирање и враќање на работниците повторно на работа ,ќе реагираме според Законот за заштита на работниците",  рече Павел Трендафилов, претседател на Синдикатот за градежништво, индустрија и проектирање.

На состојбите во велешката керамичка индустрија со загриженост гледа и Регионалниот синдикален совет. Велат дека од раководниот тим на компанијата добиле ветување дека веќе обезбедиле дел од потребните пари, купиле дел од потребните материјали и дека почнале со  ремонт на печката. 

„Информирани сме дека ремонтот ќе биде завршен до средината на август и дека работниците повторно ќе го продолжат производството. Радува фактот што доверителите, кај кои се и парите,  се заинтересирани „Киро Ќучук" да продолжи со работа, а не да оди во стечај", рече  Себо Шаќиров, претседател на Регионалниот синдикален совет. 

Големиот дефект на печката и прекинувањето со работа на фабриката  беше повод неодамна  бордот на директори да го разреши досегашниот извршен директор Кире Камчев и на негово место да постави нов.

Инаку, велешката Керамичка индустрија во последниве години постојано работи со загуби. Покрај  неисплатени плати и  придонеси на работниците компанијата има обврски од над сто милиони денари кон УЈП и кон доверителите.

Дали новиот раководен тим ќе ги обезбеди потребните средства за ремонт на големата печка и ќе подмири дел од обврските или пак,  како и на многу други фирми во Велес, и на „Ќиро Ќучук"  ќе му биде ставен клуч.