Иако сезоната на археолошки ископувања одамна почна, Народниот музеј од Велес  се уште чека  Министерството за култура да му ги  префрли одобрените 200.000,00 денари за реализација на  годинашната програма за археолошки истражувања.

Со средствата археолозите  треба да ја продолжат третата фаза на  истражување на локалитетот Кале   кај село  Згрополци, каде што има хелинистичко-римска населба и некропола.

Во изминатите две лета велешките археолози работеа на ископување и истражување  на некрополата. Тие планираат да продолжат со истражувањето и ова лето, но  за тоа се уште  чекаат  да им бидат префрлени  одобрените средства.

Како што не информираа , одговорните од археолошкото одделение во Народниот музеј во Велес, од Министерството за култура се чекаат и одобрените 100.000 денари  за изложба  на експонати од  богатата  нумизматичка колекција на Музејот.