Лебот во Велес се продава за 25 денари, а во Скопје истиот за 21 денар. Во најсиромашниот град во држава, со најголем број стечајци, основните прехрамбени производи се со највисоки цени. Вака денеска се пожалија од Здружението Страв, луѓето кои со години живеат без скршен денар, пред се „благодарение" на долгата транзиција. Тие не можат да сфатат зошто  нивниот предлог закон не може да помине, кога во периодот од 2000 до 2006 година биле изгласани дури четири закони за згрижување на стечајците со исти критериуми. 

„Вкупниот број на стечајни работници што ги сервисира министерството за труд и социјала во 2003 се движеше околу 10 илјади а сега се само 3.720. Тука спаѓа и бројот на технолошки вишок. Се прашуваме зошто тие ги остварија своите права, а ние не иако имаме исти барања", рече Томо Крстиќ, претседател на СТРАВ. 

Според Здружението, моментално на ниво на држава, од некогашните 45 илјади стечајци, паричен надомест земаат само 24 илјади. Од Страв прашуваат зошто кога има постоечки закони, нивниот закон со кој бараат да бидат згрижени, не сакаат да го изгласаат. 

„Ние нема да се откажеме од барањата. Ќе им доставиме податоци на пратениците на кој начин своите права ги оствариле стечајците пред нас, за да видат дека истите тие права ги бараме и ние", рече Крстиќ. 

Поради високите температури стечајците штрајкот го ставаат во мирување. Најавија дека од септември повторно ќе го актуелизираат и ќе протестираат се додека не го решат проблемот.